Hið nýja landslag

Ég upplifi oft ákveðna tilfinningu þegar ég kem heim til Íslands eftir veru í fjarlægum og ólíkum löndum. Um leið og ég geng út af Leifsstöð og við mér blasir fjallasýnin finn ég yfirleitt hvernig slaknar á einhverju innra með mér - ég er kominn heim, heim í eitthvað kunnuglegt landslag sem samsvarar "landslagi" innra með mér. Ég finn fyrir sambærilegri tilfinningu í dag gagnvart því samfélagi sem var hér á landi fyrir ekki svo löngu. Þetta samfélag var orðið mér framandi og í dag finnst mér ég kominn heim í kunnuglegra "landslag". Hér er þrátt fyrir allt að komast á samfélag með aðeins meira jafnræði og jöfnuði, nær því sem var og sem á betur við í svona fámennu landi. Laun hinna nýju bankastjóra eru t.d. eitthvað sem ég get skilið og haft skoðun á og jafnvel hneykslast yfir - þær upphæðir sem viðgengust áður ... maður klóraði sér bara í hausnum yfir þeim, tengdi ekki við þær. Þetta er kannski dýru verði keypt, en vel þess virði. 

Athugasemdir

[Eygló (IP-tala skráð) 3.11.2008 kl. 20:44]

Er alveg sammála þessu með landslagið, það innra og afslöppunina. Furðulegt er það finnst mér.

[Veraldarálfurinn (IP-tala skráð) 10.11.2008 kl. 00:09]

Já - ég tek heils hugar undir þessa færslu.

Ég hef horft hjálparlaus á hvernig landið mitt hefur týnt sér í einhverju kviksyndi yfirborðsmennsku og græðgi - og svo all skyndilega eru 'menn ársins' horfnir, milljarðar horfnir, heimilin eitt feilspor frá gjaldþroti.

 ... og daglega koma upp ábendingar um að stjórnvöldin - fulltrúar fólksins - virtust vera með í partýinu.